2010-4-4感情密令 陳法拉愛低調

falafan

感情密令 陳法拉愛低調
太陽報2010-04-04

        有了愛情，生活就會起了莫名其妙的變化，哪管是陳法拉那段真的假不了的愛情，或是朱璇陶醉於兩個假的真不了的靚仔男友……一旦驚動了愛情，真真假假，對對錯錯，是苦是甜，她們永遠都逃不出這象牙塔！
       
       
        法拉選擇愛得低調，朱璇則拒愛靚仔，兩女初闖影壇即嶄露頭角。
       
        愛情篇：
       
        感情藏不了怎麼辦，就是被公開？拆穿了又如何，就是開記者會？原本兩個人的事，為何要在鎂光燈下交代個沒完沒了？遙望「Sa基」搞出一台迫不得已的大龍鳳，陳法拉如牛飲水，冷暖自知！她沒有想過要「收埋」一段感情，但食得這行飯，又要把「他」保鮮，惟有把一切低調。
       
        與Neway大公子薛世恒相戀，法拉從沒多言，想的只是低調處理，不是她害怕公開了，而是擔心被指桑罵槐：「我以前冇諗過要將感情收埋，讀書時同男朋友拖手出街，絕對唔會有避忌，爹哋媽咪亦唔會反對，更唔怕其他人嘅目光；可惜我呢份工作唔可以令我有正常嘅感情生活，如果我要有私人空間，就要咁做。」
       
       
        為保私人空間，法拉選擇愛得低調，因深怕感情變質。
       
        法拉說時嘴唇繃緊，似慨嘆甚麼，似可惜了甚麼：「如果我哋拖手出街畀人見到係唔緊要，最怕係畀狗仔隊影到，跟住就作一大段嘢出嚟，咁係會好影響雙方感情，所以我要迫不得已咁做！」
       
        同情Sa基婚變
       
        男友的家族坐擁億億聲的唱K王國，連拍拖都要閃閃縮縮，對不明白事理的人來說，絕對講不過！幸而法拉就是幸運的一個，有一個通情達理的男友：「我覺得最緊要係有共識，要溝通番，大家有呢個共識就乜都唔介意。呢個始終係中國人嘅社會，都係唔好咁高調，如果你生活好，有個好歸宿，佢哋會恭喜你；但係呢度就算你搵少少錢，就會有人話你Show Off！」她續說：「如果同人拍拖又會話你搭上乜乜太子爺，好似有個牌掛喺頸度，令真感情變質，係人都唔想掛住呢個牌！」
       
        甚麼叫做瞞不了的婚姻？又不是積金局不公開財政儲備，我們生活質素有影響嗎？法拉睇完蔡卓妍（阿Sa）與鄭中基（Ronald）的記者會，有感而發地說：「我真係睇到眼濕濕，陰功！離婚都要畀人挖真相，仲要畀人講出現第三者，太傷人喇！我哋要尊重人，考慮人嘅感受！佢哋開記者會要好有勇氣至得，真係好叻！我覺得阿Sa同Ronald都係有感情嘅人，佢哋唔公開咁多，一定有佢哋嘅原因！」
       
        一個瞞婚的決定，冇人希望因此終老，法拉坦言就算做這決定，也不能只得一隻手掌拍得響：「兩個人冇可能完成呢個決定，係要經兩邊家庭商量，兩邊家庭首肯先OK，所以呢個係6個人嘅決定，包括雙方家長！」
       
       
        法拉與薛世恒拍拖已是公開的秘密。
       
        諸葛梓岐（右）和法拉這對未來妯娌引發不少罵戰。
       
        法拉（左）希望如惠英紅般，演技獲認同。
       
        事業篇：
       
        法拉予人的感覺愈來愈家嫂，現實生活如是，戲中的她亦如是。就是因為做了「Laughing嫂」，法拉有機會問鼎金像獎最佳新人。以候補身份獲得提名，法拉誠然冇期望就不會有失望：「真係唔怕今次會輸，如果我一開始就有得提名，信心大咗反而會日諗夜諗，依家我只係候補入圍，驚喜大好多！」
       
        一直活於電視圈，在井底下法拉不知道外面世界多遼闊，到底信心有幾多，認真無從稽考，法拉說：「真係唔知，我真係好少接觸電影，投票機制係點我都唔知，點先可以為自己拉票我亦都唔知。會唔會《十月圍城》係大製作，所以勢力會強啲呢？其實有得入圍已經係恩賜喇！套戲收得已經當攞獎！」
       
        法拉其實是一個有自知之明的人，怎會不知道距離獎項有多遠？從「Laughing嫂」的表現，她一語道破自己的演技問題：「我問過導演邱禮濤自己係咪未夠班？佢雖然話收貨，但我知道自己有太多進步空間。好似拍貨櫃車嗰場車戲咁，因為我唔識就位，令發揮唔平均，自己當時冇留意到光位，搞到要補Close up，要重新打過燈！因為我一個麻煩累到成隊Crew，真係好大壓力！」
       
        唔介意做綠葉
       
        奪獎的成敗是不會影響闖影圈的心，因為法拉相信自己的能力，她說：「我有信心喺影圈發展，我知道呢度唔會有慣性收視，我知道呢度要一步一步嚟，不過我有Heart，我有心機去對待每一套戲，我會吸取前輩嘅演戲方式，自己去加以改良，變成陳法拉自己嘅演技！」
       
        法拉自言是一個有野心的人，但她的野心不在於眼前速食的功名利祿：「夢好大係無止境，好多人都想做到前人達唔到嘅位置。不過我唔想一曝十寒就話要進軍荷里活，而係更長遠嘅Career，我想好似惠英紅咁，直到長遠嘅認同，係有本事令我用演技呢種技能成為終身職業！綠葉我唔介意做，我入行到依家都好少做女主角，不過只要得到大家嘅讚許，做一百次綠葉又有乜所謂。」
       
        刻下的法拉希望以演員成為終身職業，那麼愛情呢？她嫣然一笑說：「愛情唔可以當返工，拍拖結婚係好重要，無論男同女都一樣，係生活一部分！」
       
        發哥睇好攞新人獎
       
        陳法拉與朱璇均有份提名今屆金像獎最佳新人，早前周潤發更點名睇好法拉，能得如此大明星睇好，法拉說：「發哥咁讚我真係飄到上天，我同佢又唔識，又唔係朋友，估唔到佢會留意到我，冇諗過佢會提起我個名，真係要多謝發哥一千萬次！我知道自己要有更多責任感，全世界都睇住我，唔可以令觀眾失望，一定要有進步！」
       
       
        Laughing嫂一角，令法拉有份角逐金像獎最佳新人。
       
       
       
       
        後記：生仔睇Timing
       
        法拉心中有多少秘密，大家不必着急去知，但從她對婚姻的憧憬，或許可看出一些端倪，她說：「我希望有小朋友，我會Plan好多嘢，會諗生幾多個仔女好呢？睇Timing，亦要睇身體狀況。但我唔可以唔做嘢，結咗婚我都會工作，唔做嘢我會癲！」這是一條IQ題，從以上說話中，是否能看出法拉有否結婚？
       
        ArTing、韋芷茵

falafan

親情至上 朱璇棄靚仔

        愛情篇：
       
        華裔小姐冠軍朱璇（Oceane）參選時高貴大方，給人成熟穩重的感覺，但現實中這個年僅22歲的小妮子卻是傻大姐一名，無論甚麼也大笑一餐，很難想像眼前這個小女生竟能演活《淚王子》中母親的角色！
       
        22歲應該是一個充滿戀愛幻想的年齡，但Oceane不是一個愛情至上的女生，若要在親情、感情和工作中排序，她會把親情放在首位，感情只是次要，性格慢熱的她從未試過一見鍾情：「我一定要識一個人一至兩年先會培養到感情，要從朋友開始慢慢認識。」經常中、法兩邊走的Oceane亦分別交過兩國的男友，對她來說，地區並不是問題，最重要是性格配合，但她有個十分奇怪的要求，就是Mr. Right不可以太靚仔，因為這樣會比較有安全感，問到以前兩個男友是否醜男？她即陶醉地說：「之前同佢哋拍拖嘅時候，喺我心目中，佢哋都係全世界最靚仔嘅！」
       
       
        朱璇（右）和法拉曾參選華姐，亦加入無綫，難怪惺惺相惜。
       
        流落異鄉喪喊
       
        別看Oceane外貌標致應該自信心十足，原來她小時候因過高而自卑，很害怕跟人說話，她說：「我以前有心理問題，因為我仲高過啲男仔，我會覺得自己好奇怪，試過自卑到返屋企匿埋喺個衣櫃裏面唔出嚟！」後來，Oceane有機會接觸表演，性格才慢慢改變，她認為演戲時可飾演不同的人，她可以做一些現實中從不會發生的東西，隨着每次投入不同的角色，她感覺到自己的性格在慢慢改變，但笑言直到現在仍會不時感到自卑。
       
        事業篇：
       
        回想一下，演戲對Oceane的影響真的很大，當初到法國留學也是選修戲劇，現時說得一口流利法語的她當時亦碰了不少壁，她說：「我中學畢業嗰時先去法國，當時一句法文都唔識，上三個鐘嘅法文堂，我可以淨係聽得明三分鐘！嗰時真係好唔開心，日日返到宿舍都喊！」Oceane不明白父母為何可以這樣忍心，讓自己一個人流落異鄉，直到一天當她看到四十多歲的父親在離開機場時流淚的畫面才明白，她說：「我咁大個女都係第一次見到阿爸喊，我知道佢係為我好，一個女仔要學識自己獨立啲。」自此，Oceane跟自己說無論怎樣都要努力面對，她開始嘗試多用法文跟同學溝通，又每天不停看法文書、法文字典，後來漸漸逐個字逐個字看得明白，直到今時今日能順暢地用法文跟人交談，當年的努力絕對值得。
       
        對於入行兩年便被楊凡導演賞識，Oceane覺得相當幸運，毫無銀幕經驗的她首次便接演高難度角色在《淚王子》中飾演母親，更憑角色獲得今屆香港電影金像獎的「最佳新演員」提名，她說：「我真係好感恩，第一次有咁嘅成績已經好滿足，真係好好彩，入行以嚟都有好多人賞識我，多謝樂易玲小姐相信我嘅能力，將我推薦畀楊凡導演，我先有呢個機會。」該片更入圍威尼斯影展，Oceane笑言已經夢想成真，可以退休：「其實我一路以嚟有個夢想，就係可以行一次紅地氈就已經心滿意足，我仲同導演講話我已經達成夢想可以退休喇！」話雖如此，但她的演藝之路仍相當漫長。
       
        出戰法國瘀爆
       
        雖然Oceane說得一口流利的法語、英語和普通話，但她的廣東話認真麻麻，訪問期間經常說出半鹹半淡的廣東話，笑料百出：「之前我拍劇又係咁，成日都講錯嘢，其實我自己都唔知道講錯啲乜，但在場嘅人個個都喺度笑，唉！算啦！如果咁樣可以帶到啲歡樂畀人都值啦！」來港前的Oceane原來完全沒有說過廣東話，當年在法國競選時更爆出瘀事：「亞軍個名叫張璇，同我個名嘅廣東話讀音好近，當時個主持講亞軍係張璇我就衝咗出去，點知後尾畀個主持叫番我返去！」她現在正努力惡補，盡量爭取機會講廣東話，在訪問途中任由記者怎樣取笑她的廣東話，她仍堅持不講普通話。
       
        對很多人來說，親情都是無可取代，Oceane亦不例外，她跟父母感情深厚，當她拍攝《淚王子》時，每天都跟父母聯絡。談起父母，Oceane便顯得激動起來：「只要有佢哋，世界上其他一切都唔緊要！」但當遇到問題，她會選擇打電話給爸爸：「如果我打畀阿媽，佢會同我一齊唔開心，但係如果打畀阿爸，佢就會講好多鼓勵我嘅說話，令我重新振作。」對她來說賺錢十分重要，但最重要還是每天活得開開心心，Oceane說：「賺錢有邊個唔想o架？不過有好多嘢都係金錢買唔到o架！就好似親情咁，有嘅時候就要好好珍惜。」看來用「知足常樂」這四個字來形容她的人生哲理最為貼切。
       
        後記：爆笑廣東話
       
        訪問期間，整個房間不時響起Oceane清脆的笑聲，當笑得厲害時，她的眼睛更瞇成一條直線。對於別人取笑她的廣東話發音不正確，她全部處之泰然。有次Oceane把「新人房」錯說成「呻吟房」引來哄堂大笑，她只傻傻哋伸脷，裝作不明白自己說錯了甚麼，卻看見她在沒有人留意時靜靜地偷笑，真的不知道這個小妮子究竟是「真傻」還是「扮懵」。
       
        Profile
        姓　　名：朱璇（Oceane）
        年　　齡：23歲
        三　　圍：33.5、23、35
        語　　言：英語、法語、普通話、廣東話
        學　　歷：大專
        參與演出：《淚王子》（電影）、《囧探查過界》（電視）

falafan

秋香完了，基本上是没访问。托金像奖的福，这篇访问还不错。

wangzilin

媒体应该把薛生的相换一换了

falafan

没办法，老薛现在又不在公开活动出现，媒体拍不到新照，(偷)(拍)的效果又不行，所以，老薛还是给媒体一张新的好点的照片吧。

hello

终于看到一篇较正常的报道了

紫色〞星空

我也期待老薛的照片！

vickylove

这篇报道还是很正面的。。。

falafan

专访通常都是正面是。

Kenwick 粉丝报道

法拉这条裙子很好看。

wore116050362

真的挺希望~法拉可以在电影上获奖！