《家好月圓》甘詠慶Blog专贴

falafan

请大家多到甘咏庆Blog支持！网址：http://blog.tvb.com/moonlight10/

索引
2楼：2008-07-28 好高興可以喺度寫blog
3楼：2008-07-29 不速之客
8楼：2008-07-31 返新工喇！
9楼：2008-08-04 我做model？
10楼：2008-08-07 對唔住呀管家仔！
11楼：2008-08-11 得意思考題
12楼：2008-08-14 我的嫲嫲
13楼：2008-08-19 無言
14楼：2008-08-21 分分鐘需要……慶？
15楼：2008-08-25 我好幸福！
16楼：2008-08-26 電影分享
17楼：2008-08-27 你是我們最好的嫲嫲
18楼：2008-09-01 中秋之夜
19楼：2008-09-04 結婚前的對話
20楼：2008-09-08 阿月知錯架喇！
21楼：2008-09-10 俾自由佢哋啦！
22楼：2008-09-15 幸福的bb
23楼：2008-09-16 天曉得
24楼：2008-09-18 準備做媽咪
25楼：2008-09-20 永遠的嫲嫲
26楼：2008-09-21 官司輸了，但贏回個家
27楼：2008-09-21 圓滿的結局

falafan

FROM：http://blog.tvb.com/moonlight10/2008/07/28/%e5%a5%bd%e9%ab%98%e8%88%88%e5%8f%af%e4%bb%a5%e5%96%ba%e5%ba%a6%e5%af%abblog/

好高興可以喺度寫blog
網誌日期: 2008-07-28
大家好！我叫做甘詠慶，屋企人都叫我做阿慶，我啲朋友就叫我做阿Wing。我寫嘢唔係好叻，希望大家都睇得明我寫乜啦！
唔怕老實同大家「講」，我係啞嘅。雖然把口講唔到嘢，但係仲識得聽架，所以唔好講我壞話呀，我聽到架！
我唔係一出世就講唔到嘢架。我記得喺我細細個嗰時，大病一場，病到胡里胡塗，連人都唔認得咁濟。嗰時荷媽（即係我阿媽）揹住我，帶我去睇醫生。我當時病到迷迷糊糊，只係隱約聽到個醫生同荷媽講︰「你個女可能會講唔到嘢…」
雖然我聽唔清楚醫生同荷媽嘅對話，但係我好記得荷媽係點樣捉住我隻手。
當其時，荷媽一路捉住我隻手，一路聽醫生講解。當個醫生一講完「你個女可能會講唔到嘢…」，荷媽就好用力咁握咗一握。佢呢一握，我到而家都仲記得。
我知道荷媽當時一定好驚，仲要係驚到個心跳咗出嚟嗰種。而我當時病到暈吓暈吓，根本就唔識驚。後來我個病好番晒，但係個「啞病」就成為咗我嘅絕症，呢一世都跟住我。
大家唔好以為我好慘呀，其實我一啲都唔慘，因為我有一個好溫暖嘅屋企。
等我介紹吓啦，我有一大班兄弟姊妹，「家好月圓慶中秋」，一共七個，係咪好大家族呢！荷媽係我哋嘅一家之主，我哋全部都睇佢頭架。至於我哋嘅爸爸，叫做jo飽，喺十幾年前同荷媽離咗婚，同另一個女人建立咗第二個家庭。不過我哋都有聯絡架，年年中秋節大家都會聚一聚，食餐團年飯，關係都ok啦！
我嘅屋企就分享完嘞，你哋嘅屋企呢？有咩趣事都可以同我分享架，我好樂意聽架！

falafan

FROM：http://blog.tvb.com/moonlight10/2008/07/29/%e4%b8%8d%e9%80%9f%e4%b9%8b%e5%ae%a2/

不速之客
網誌日期: 2008-07-29
唉！嗰個莎姨真係好難頂呀！一日到黑把口都冇停過，belebala講個不停，真係好鬼煩呀！佢返嚟嘅第一日就已經彈呢樣彈嗰樣，又嫌我哋屋企”屈質”，仲要下下提住荷媽係棄婦呀！如果我可以開口講嘢，我一定會大大聲聲話：「唔該你講嘢之前諗吓人哋嘅感受，學識尊重身邊嘅人啦！」可惜我講唔到吖，做手語佢又唔識睇，仲要成日俾佢話我指手劃腳。
喂，我呢啲係手語嚟架，係語言嘅一種嚟架，唔係指手劃腳呀！俾佢講到我好似個傻婆咁。唉，對住佢真係無奈呀！
不過，荷媽都講得啱嘅，話晒都一場親戚，又冇做啲咩衰嘢，只係口沒遮攔咗啲啫，咪盡量容忍佢囉…
唉，不過都係難頂架喇！
夜晚食飽飯，無無聊聊冇嘢做，落咗去公園散步，順便幫荷媽買豉油。唔覺意抬頭一望，見到天上面嘅月亮又圓又大，十足十一粒湯圓咁。
記得細個嗰時嘅中秋節，成班兄弟姊妹喺天台度玩燈籠，管家仔就最鍾意扮超級撒亞人，當我哋啲燈籠係怪獸咁打，仲唔小心整跌咗我碗湯圓添。嗰陣時我詐諦係咁喊，驚到佢手騰腳震，猛咁話賠番粒湯圓俾我。當時我就指一指天上嘅月亮，要佢賠天上面嘅湯圓俾我。
哈！點知佢求其搵咗碗清水嚟，話入面個倒影就係月亮湯圓喇，仲叫我千祈唔好食，食咗嘅話出年就睇唔到月亮架喇。嗰陣時我又真係戇居居咁信佢講，成晚坐喺碗清水隔離看守住，驚住個月亮跌落地。
嗰晚我不斷同自己講︰「如果跌爛咗個月亮，出年就冇中秋節架喇…」哈！細個真係傻！不過而家諗番都幾甜蜜嘅。

SASA

留言啊~~

cusa2005

:yc15 这个还专门开个BLOG，TVB还真是重视

falafan

原帖由 cusa2005 于 2008-7-31 08:00 发表
:yc15 这个还专门开个BLOG，TVB还真是重视

去年溏心时开此先例，增设了好多栏目，所以今年家好网页才这么多内容 今年应该还会有家好聊天室什么的

zuan

这个bolg有创意的

falafan

FROM：http://blog.tvb.com/moonlight10/2008/07/31/%e8%bf%94%e6%96%b0%e5%b7%a5%e5%96%87%ef%bc%81/

返新工喇！
網誌日期: 2008-07-31
今日攰得好緊要呀！放咗工，一返屋企就撻咗落床喇，成身好似散晒咁，手手腳腳都”冤”住”冤”住咁痛。好彩荷媽幫我捽咗啲藥酒，而家先好番啲咋。
今日係我甘詠慶第一日返新工，我喺一間廣告公司度做初級文員，間公司都幾大規模架，仲要近阿月間公司，我哋以後仲可以一齊食lunch添！
不過尋晚真係好緊張呀，完全瞓唔著，眼光光望天光。今朝搭小巴返工嘅時候又緊張到手心冒汗，好彩阿月喺隔離安慰我，我先至冇咁驚咋。
一去到公司，諗住打醒十二分精神，唔好俾自己犯錯，點知成朝就喺度行行企企，乜嘢都唔駛我做。唉，我都有自知之明嘅，連一個電話都唔能夠接聽，點會有人肯俾嘢我做吖…
但係我真係唔想咁冇用呀，我真係想幫吓手呀！於是我鼓起勇氣，自告奮勇去送一件急件。好彩Kelvin都肯相信我，肯俾我去。
點知送文件嘅中途遇著大塞車，我又唔識路，唯有喺街度盲摸摸。諗住問人路啦，啲人又以為我做問卷調查。嗰一刻我真係覺得好無助架，好似俾呢個世界孤立咁，喺條街度都唔知點算好…
後來我打咗俾管家仔求救，佢同荷媽，仲有香姑佢哋，一齊教我點行。雖然最後都係遲咗，但係個經理都好體諒，冇鬧到我。
真係好多謝！好多謝呀！我覺得自己雖然講唔到嘢，但係有一班咁錫自己，無論風雨都喺背後支持自己嘅屋企人，我真係覺得自己係好幸福呀！
尤其要多謝管家仔呀，有哥如此真係夫復何求呀（學吓荷媽啲老土嘢先^v^）！管家仔，你個妹以後會好俾心機做嘢，唔會辜負你嘅期望架，I promise！
p.s. 仲要多謝于素秋幫我搵到份好工呀，得閒多啲上嚟食飯啦！

falafan

FROM：http://blog.tvb.com/moonlight10/2008/08/04/%e6%88%91%e5%81%9amodel%ef%bc%9f/

我做model？
網誌日期: 2008-08-04
今日，我上咗架遊艇度做model，起初都唔係咁想去，不過見阿卡苦苦哀求，唯有頂硬上，即管試吓啦！嗰個係一個推銷手提電話嘅function，我哋成班model穿著唔同嘅服飾，喺架遊艇上面行catwalk，行到最後就將手機放在耳邊，好自信咁講一句宣傳slogan。
本來呢啲嘢就難唔到我嘅，只係最後嗰句slogan我講唔到，淨係可以口噏噏，夾口形，真係好瘀呀！
完咗個show之後，阿卡猛咁讚我同阿月有專業水準，拍得住啲正職model！
我心諗，我連句宣傳slogan都講唔到，咁都稱得上專業？我諗應該唔得啩！
雖然專業model就做唔到喇，但係專業嘅OL都勉強可以嘅！
最近開始適應寫字樓嘅生活，啲同事都慢慢懂得點樣同我溝通。
佢哋一見到我攞本記事簿出嚟，都會意會到我有嘢想講，然後耐心咁等我寫完我想講嘅嘢。
不過，我通常都寫得好快嘅，費事要人家等太耐嘛！
唉…如果公司啲人識得睇手語就好喇！

falafan

FROM：http://blog.tvb.com/moonlight10/2008/08/07/%e5%b0%8d%e5%94%94%e4%bd%8f%e5%91%80%e7%ae%a1%e5%ae%b6%e4%bb%94%ef%bc%81/

對唔住呀管家仔！
網誌日期: 2008-08-07
好耐冇寫blog喇，有啲生疏添。隔咗一排冇打，首先要同一個人道歉先︰對唔住呀，管家仔！
一日都係我唔好，如果當日你唔係幫我出頭，就唔駛搞到入醫院，你同婷婷就唔駛分手！今次你哋喺番埋一齊冇耐又分手，我知道唔多唔少都關我事架！
管家仔，你對我哋實在太好喇，你為咗頭家付出太多喇，你要為番自己多啲呀！有時我真係希望你可以自私一啲，起碼你會對自己好一啲呀嘛。
今日喺公司做錯咗少少嘢，將兩個會嘅files調轉咗，阻咗成班同事唔少時間，真係唔好意思。不過，Kelvin好好人呀，佢知我係一時大意，冇怪我不特止，仲請我飲嘢安慰我添，搞到我都有啲唔好意思。
Kelvin仲幫我同班同事講sorry（而我就喺佢旁邊猛咁用手語講sorry），仲請晒班同事飲下午茶當賠罪添，真係唔該晒呀！
最近開始對莎姨有少少改觀，其實佢都唔係好衰嘅，只係平時口不擇言啫，見到佢一個人冇人冇物，個女又唔喺佢身邊，又真係幾可憐嘅。佢嘅性格雖然唔係幾好，但係有時都會幫荷媽同我哋出頭，等我哋唔駛俾Jo飽恰，佢嘅行為都幾大快人心架！

falafan

FROM：http://blog.tvb.com/moonlight10/2008/08/11/%e5%be%97%e6%84%8f%e6%80%9d%e8%80%83%e9%a1%8c/

得意思考題
網誌日期: 2008-08-11
啱啱上網，發現咗一條幾得意嘅題目︰
★ ★ ★ ★ ★ ★ ★ ★ ★ ★ ★
一個教授給一群學生出了這麼一道題目︰
一個聾啞人到五金商店買釘子，先將左手兩個手指作持釘狀，
放在櫃台上，然後右手作錘打狀。
售貨員遞過一把錘子，聾啞顧客搖了搖頭，
指了指作持釘狀的兩個手指，售貨員終於拿對了。
這時候又來了一位盲人顧客…….
「同學們，你們能否想像一下，盲人將如何用最簡單的方法買到一把剪刀?」
如果你是當中的一個學生，你會怎樣回答教授呢??
不可想太久….
十秒內答……..
哈哈…
很容易的唷…..”
答案在下面…..
你是否答︰
只要伸出兩個指頭模仿剪刀作剪布的動作就行了。
錯了!!
其實，盲人只要開口說一聲就行了。
★ ★ ★ ★ ★ ★ ★ ★ ★ ★ ★ ★ ★ ★
哈哈，俾佢”陰”到添！
不過我答錯咗係正常嘅…
因為我買嘢不嬲都係靠做手勢嘅，所以一開始就先入為主嘞！
你哋呢，答唔答得啱呀？

falafan

FROM：http://blog.tvb.com/moonlight10/2008/08/14/%e6%88%91%e7%9a%84%e5%ab%b2%e5%ab%b2/

我的嫲嫲
網誌日期: 2008-08-14
記得細個嗰時，嫲嫲成日帶我哋去玩，去海洋公園啦，去搭叮叮啦，嫲嫲帶親我哋出去，大家都會好雀躍，就算只係喺公園兜個圈，我都會好興奮，好似去旅行咁。但係，每當嫲嫲帶我哋番屋企，就會同荷媽嗌大交，搞到屋企大地震，我哋幾兄弟姊妹喺旁邊都唔知點算好…記得有一次，我哋一家人去旅行，嫲嫲同我哋成班細路孖房瞓，而我就同嫲嫲孖床瞓。我好記得嗰晚臨瞓嘅時候，嫲嫲同我講︰「阿慶呀，夜晚聽到嫲嫲嘅鼻鼾聲就大力啲推醒嫲嫲，嫲嫲會打側瞓，打側瞓就冇鼻鼾架啦。」個晚，嫲嫲真係成晚打鼻鼾，而我不斷咁推醒佢，佢打側瞓咗一陣又轉姿勢，之後又再打鼻鼾。我成晚都聽住佢嘅鼻鼾聲，瞓都冇瞓過。最後我頂唔順，好大力咁推咗嫲嫲落床，累到佢撞親個頭。嫲嫲當然冇怪到我，但係我個心就好內疚，內疚到而家！
有時候，嫲嫲會做咗一啲傷害我哋屋企嘅事，但係我知道佢係唔想架，正如佢都唔想成晚打鼻鼾，嘈住我瞓覺，但係我就好衰咁推咗佢落床。
我哋唔應該怪嫲嫲，嫲嫲最錫嘅就係我哋，佢將我哋成班孫放喺第一位，我哋個個都係佢嘅心肝命椗，只要我哋開心，佢都會開心！
嫲嫲，你永遠都係八月十五嘅月亮！

falafan

FROM：http://blog.tvb.com/moonlight10/2008/08/19/%e7%84%a1%e8%a8%80/

無言
網誌日期: 2008-08-19
我嘅心有好多嘢想同人講…
我想其他人聽到我嘅笑聲…
我想唱歌俾身邊嘅人聽…
我想同人分享、溝通、談天說地…
點解我統統都做唔到…
喺呢一刻我真係唔想再講…
就算我講，又有邊個可以聽到？

好想睇多次jo飽嘅手語歌呀……

falafan

FROM：http://blog.tvb.com/moonlight10/2008/08/21/%e5%88%86%e5%88%86%e9%90%98%e9%9c%80%e8%a6%81%e2%80%a6%e2%80%a6%e6%85%b6%ef%bc%9f/

分分鐘需要……慶？
網誌日期: 2008-08-21
「有了你開心啲，乜都稱心滿意，肥牛雜菜也好好味！
我與你永共敍，分分鐘需要你，阿慶是陽光空氣。
扮靚啲皆因慶，癲癲地都因慶，為你甘心作傻事，
扮下猩猩叫，睇到乜都笑，有慶在身邊多重要。」
呢首歌就係我個傻大佬，管家仔先生唱嚟氹本小姐開心嘅，皆因本小姐失戀，心情唔多好，隨時會發人脾氣，所以個傻大佬就唱首歌嚟鎮住我囉！
其實，我已經逐漸平靜咗落嚟，冇之前咁唔開心架喇，大家唔駛擔心我喇！
以前，我太過介懷自己係啞妹，搞到個人好消極，成日苦日苦面。
以後，我會放開一啲，勇敢一啲，唔怕人哋眼光，唔怕俾人手指指，積極做好自己本分，活得開心一啲，有意義一啲。
至於Kelvin，我並冇嬲佢，因為呢個係佢嘅意願，我會尊重佢！
不過我真係唔想再麻煩到佢，先至唔駛佢幫我搵工，何況搵工呢啲嘢，我咁大個人自己應付到架喇！
哈哈！我係咪獨立咗呢？

falafan

FROM：http://blog.tvb.com/moonlight10/2008/08/25/%e6%88%91%e5%a5%bd%e5%b9%b8%e7%a6%8f%ef%bc%81/

我好幸福！
網誌日期: 2008-08-25
自從同Kelvin復合之後，我開始對自己有番啲信心，我知道Kelvin唔係嫌棄我，而係孝順佢嘅媽媽。我開始相信我同Kelvin真係可以一生一世，就算將來有幾大嘅困難，只要我同Kelvin個心都係向住對方就可以。但係，原來愛情唔只係兩個人嘅事，我唔可以剩係顧Kelvin感受而完全唔理身邊嘅人。Kelvin媽媽做得好啱架，佢一個人捱大Kelvin已經好唔容易，捱到Kelvin出身，自己又得到個糖尿病，佢嘅一生真係好苦。
如果Kelvin真係同我一齊，佢媽媽又要照顧一個講唔到嘢嘅新抱，到頭來係苦上加苦。我同Kelvin媽媽唔係一家人，冇理由要佢為我付出咁多…
我而家終於明白，荷媽點解咁積極幫我搵工。佢想我自立，佢想我可以自己照顧自己，甚至照顧身邊嘅人，佢唔想我成世做其他人嘅負累。
荷媽，我知道你嘅苦心喇！
以前嘅我，終日苦口苦面，覺得自己嘅人生好悲慘，成世只係會成為別人嘅負累。而家我諗通晒喇，我雖然係啞妹，但係我都可以有自己嘅人生，我都可以為自己爭取幸福。
我呢一生並唔悲慘，只係我身在福中不知福！不知福嘅人根本唔配有幸福.！就好似我咁，唔係個天唔俾幸福我，係我自己趕走晒咋！我有一個咁溫暖嘅屋企，有個咁錫我嘅男朋友，我仲要奢求啲乜嘢呢？
邊個話我講唔到嘢架？邊個話講嘢一定要用把口架？真正嘅溝通係用個心，真正嘅愛係以心傳心架！Kelvin，我唔知道將來會變成點，我只係想將我心裡面嘅一句話直接傳入你個心入面…

falafan

FROM：http://blog.tvb.com/moonlight10/2008/08/26/%e9%9b%bb%e5%bd%b1%e5%88%86%e4%ba%ab/

電影分享
網誌日期: 2008-08-26
尋日，我睇咗一套八十年代嘅舊片–搭錯車。
故事講述一個啞的退伍老兵，以收購廢品和空酒瓶為生，一日在路上拾起一個被棄女嬰，於是取名”小美”，並撫養長大。小美長大後，搖身一變成為紅歌星，為了維護形象而無法認啞叔為父。啞叔因而大受打擊，鬱鬱而終。小美得知此消息，後悔不已，在舞臺上高唱”酒矸倘賣無”，獻給辭世的老父。
睇完之後，個心”拿”住”拿”住，好耐都平伏唔到。
啞叔嘅無私奉獻，令我好感動…
小美最後唱個首”酒矸倘賣無”，令我好心”噏”！
其實，整套戲嘅主題就係「樹欲靜而風不息，子欲養而親不在」
係咪好老土呢…
不過，越係老土嘅說話就越有道理！
點解？
就係因為有道理，所以有好多人講，啲人講得多咪變老土囉！係咪？
所以呢，就算幾老土都好，我都要同jo飽講︰「jo飽，I love you！」
我唔想好似小美咁，只可以憑歌寄意，懷念佢嘅爸爸。
我已經有大大個jo飽棟在響度，如果我再唔識珍惜，第時後悔都冇用架喇！
Jo飽，無論以前你點對我哋，我都唔會放喺心度，我哋全部黐頭芒都原諒咗你架喇！你唔好咁內疚啦，你內疚，會搞到我哋都好傷心架！

falafan

FROM：http://blog.tvb.com/moonlight10/2008/08/27/%e4%bd%a0%e6%98%af%e6%88%91%e5%80%91%e6%9c%80%e5%a5%bd%e7%9a%84%e5%ab%b2%e5%ab%b2/

你是我們最好的嫲嫲
網誌日期: 2008-08-27
嗰晚，嫲嫲病得好嚴重，我同管家仔瞓喺病床旁邊，陪住嫲嫲。因為係深夜，所以四周圍都好靜。
忽然之間，嫲嫲好辛苦，好似呼吸唔到咁，情況好危急，大家都好驚！
好彩，最後嫲嫲總算大步檻過，我哋個心先至定番啲！
嫲嫲最危急嘅時候，口up up咁up咗幾個數字，原來係以前屋企嘅電話號碼！
佢一生人最快樂嘅時光，就係同我哋六粒孫仔一齊相處嘅日子！
原來，我哋喺嫲嫲心目中係最重要架！
細個嘅時候，嫲嫲帶我哋去玩，去搭”叮叮”。
等嫲嫲好番啲，我好想帶番佢周圍玩。
我好想話俾佢知，雖然我哋而家唔係同你一齊住，但係我哋一樣好緊張你，好孝順你，只要你開句聲，成班孫仔都會飛身撲去你身邊！
因為，你是我們最好的嫲嫲！

falafan

FROM：http://blog.tvb.com/moonlight10/2008/09/01/%e4%b8%ad%e7%a7%8b%e4%b9%8b%e5%a4%9c/

中秋之夜
網誌日期: 2008-09-01
半夜三更瞓唔著，望出窗外嘅天空，見到一個又大又圓嘅月亮。個天越暗，個月亮就越皎潔、越明亮。
我深呼吸咗一口氣，覺得半夜嘅空氣好清新、好舒服、好寧靜。
好似冇晒所有煩惱，只有滿足嘅感覺。
我覺得，今年嘅中秋節，月光特別圓之餘，仲特別甜。
甜就甜在一家人一齊整月餅，跟住一齊食月餅、講爛gag、慶祝中秋節。
最甜嘅係，有人失驚無神攞住紥花，攞住隻戒指，好有誠意咁向我求婚！
因為佢平時好少做呢啲嘢架，所以今次真係好surprise呀！
佢仲講咗個月亮的故事，話咩個月亮會關照佢喎！
哈！乜月亮都會關照人嘅咩？傻瓜！
不過你想像力咁高，都算合格做甘詠慶嘅老公嘅，起碼估到我想講乜，唔駛我下下做手語嘛！
★ ★ ★ ★ ★ ★ ★ ★ ★ ★ ★
Kelvin，答應嫁俾你，只係一兩分鐘嘅事，但係雙方嘅承諾，係一生一世。
我希望可以同你互相倚靠，一齊走將來嘅路…

falafan

FROM：http://blog.tvb.com/moonlight10/2008/09/04/%e7%b5%90%e5%a9%9a%e5%89%8d%e7%9a%84%e5%b0%8d%e8%a9%b1/

結婚前的對話
網誌日期: 2008-09-04
上網搵到一篇幾得意嘅對話，唔知你哋睇過未呢？我覺得好搞笑呀！<結婚前的對話>
男：太好了！我期盼的日子終於來臨了！我都等不及了！
女：我可以反悔嗎？
男：不，你甚至想都別想！
女：你愛我嗎？
男：當然！
女：你會背叛我嗎？
男：不會，你怎麼會有這種想法？
女：你可以吻我一下嗎？
男：當然，決不可能只有一下！
女：你有可能打我嗎？
男：永遠不可能！
女：我能相信你嗎？
至於結婚後的對話，就係由下而上咁睇嘅…
哈哈！睇唔睇到呀？
★ ★ ★ ★ ★ ★ ★ ★ ★ ★ ★ ★ ★ ★ ★ ★
好喇！搞完笑嘞，講番啲正經嘢先！
記得有一次，我同于素秋、管家仔一齊食肥牛粉絲煲。
食食吓，我同阿秋講，覺得自己同Kelvin嘅距離好大，因為佢學歷高過我，而我又講唔到嘢。然後，阿秋同我講，我同Kelvin嘅差距只係身高上差一兩吋，其他就乜都冇架喇！
當時我聽到佢咁講，個心安定咗啲，開始對我同Kelvin嘅關係有番信心！
而家，我已經做咗Kelvin老婆，兩個人日對夜對，大家都唔覺得悶，而且仲覺得好sweet添！奶奶對我都好好，當我係親生女一樣，得閒又會約荷媽出嚟，傾吓啲父母經，緬懷一下過去，不知幾投契！
不過，我成日會諗，呢種美滿嘅生活，究竟會last幾耐呢？
將來仲會唔會咁幸福呢？
Kelvin會唔會好似上面段對話咁，結婚前一個版本，結婚後又另一個版本呢？
諗吓諗吓…發覺自己好傻呀！
將來嘅事邊個會知啫，最緊要活在當下，珍惜現在有嘅一切，咁咪無憾囉，係咪？

falafan

FROM：http://blog.tvb.com/moonlight10/2008/09/08/%e9%98%bf%e6%9c%88%e7%9f%a5%e9%8c%af%e6%9e%b6%e5%96%87%ef%bc%81/

阿月知錯架喇！
網誌日期: 2008-09-08
阿月份人係衝動啲，但係佢心腸唔壞架，大家唔好當佢係搞風搞雨嘅是非精啦，唔係架，阿月唔係咁架！今次件事，就算佢真係有錯，我都相信佢唔係專登架！

你哋試諗吓，嘉美未返嚟嘅時候，阿月同阿卡相處得好開心架！

但係，嘉美嘅出現，令到阿月同阿卡嘅關係變得好惡劣，嘉美就好似要取代阿月咁，喺公事上做得比阿月好，喺感情上又同阿卡發展緊，一切就好似衝住阿月而嚟咁，搞到佢好唔開心！

可惜我結咗婚，唔可以好似以前咁，成日陪住佢，同佢傾計，如果唔係我會阻止到阿月，唔會俾佢做錯事！

為咗呢件事，阿月已經where爛塊面，向荷媽認錯，亦都流咗不少眼淚，希望大家以後都可以和平相處，屋企唔好再咁多是非喇！