2013-11-21 陳法拉單身快樂--法拉签鍾珍

Li_Nus

專訪 丨 2013-11-21 丨 HKChannel  


      周二晚的TVB台慶，剛離巢的陳法拉未獲邀請去撐場，不過，逃離將軍澳後的法拉得到新任經理人鍾珍照顧，幫她狂接job，人氣、荷包都保得住，據知，國際護膚品牌OLAY睇中法拉的獨特氣質，不惜動用七位數字力邀她出任香港區代言人，分擔多年的港、台代言人，大肚徐熙媛(大S)的宣傳重責！法拉未傾掂已相當興奮：「我未做過護膚品代言人，好想接，因為廣告中嘅主角都影到好靚！」天大地大，拒絕做井底蛙的陳法拉飛甩TVB仍然有運行。

化妝及髮型：Annie G.Chan
場地提供：Ambrosia Oyster Bar & Grill

      女仔邊個唔貪靚？尤其是女藝人，有錢袋兼且奉命扮靚，陳法拉恨做護膚品代言人恨到出面，她更自爆：「由細到大我都好鍾意扮靚，亦好勤力護膚，連大髀都好注重，試過喺大髀搽美白產品幾個星期，測驗產品質素同效果，化妝師就取笑我係白老鼠，乜都夠膽死，始終樣貌、外表係搵食工具，但凡贊助嘅護膚產品都會嘗試。講到五官同身體，我最滿意係膊頭，因為夠橫似男人膊，容易晾得起件衫。」

心情豁然開朗


       陳法拉同薛世恒分手後發表獨身宣言，強調都係做嘢好，工作可帶來安全感，日日顧住做嘢，唔發現有追求者：「女人喺工作、外貌同感情方面都需要增值，點樣增值？咪對自己好啲，自己要多啲愛錫自己，例如用質素好嘅護膚品，同朋友去下旅行咁囉！家陣自由身好想放多少少假去探屋企人，前幾年顧住開工抽唔到時間，兩老都年紀大，媽咪經已退休，好想可以同屋企人去下旅行，同家人相處係無價嘅。」法拉坦承，現階段最輕鬆自在，最relax，全賴之前在美國進修，導師教授如何能放鬆自己，竅門被打開後，心情自然開朗，懂得調節就自然體會到美好生活無處不在，所謂相由心生，心情好，人都靚啲！問到是否跟放低感情包袱有關？她即澄清：「唔係，以往都冇包袱，感情係人生經歷，兩個人真心相愛，互相信任係好難得嘅事。」

唔認同頒獎禮

      在TVB多年，法拉一直默默拍劇，從來冇機會拍大陸劇搵「人仔」，更加同視后絕緣，台慶頒獎禮將至，已變TVB「路人甲」的法拉又點睇視帝視后熱門人選？跟TVB分手的法拉今時唔同往日，敢言不太認同台慶頒獎禮：「老實講，應該用邊把尺去量度？好似《衝上雲霄2》Sam哥同Cool魔都用唔同性格去演繹，根本無得比較，都係睇觀眾喜好。」當問到想唔想拎視后時？她即說：「唔刻意，唔強求，求獎項，就唔會放得鬆！最大獎項，係自己不斷求進步，不過，自己都好幸運，好感恩，由新人開始TVB都畀咗好多機會。」講到花旦接班人，法拉睇好港姐出身的朱千雪，大讚對方夠自然舒服，就算做主持都唔係死背稿，好有潛質。至於明年會否幫娘家拍劇？法拉就話要睇天時、地利，回復自由身後以拍戲為主，Fans要睇法拉演出就要買飛入場了。