2008-3-1無綫三姐仔爭凳仔？子珊、嘉欣、法拉先禮後兵

falafan

無綫三姐仔爭凳仔？
女人斟：子珊、嘉欣、法拉先禮後兵
蘋果日報2008-03-01        

        陳法拉──被封姣精又被指搶鏡，是非新聞多籮籮。
        鍾嘉欣──性格低調乖巧，猶如白紙般的是非絕緣體。
        徐子珊──外表平凡身材普通，但演技漸獲讚賞。

        三個差不多同期出道但性格不同的選美佳麗，被無綫視為今年重點力捧的對象、上位花旦，雖然大家實力相當，但彼此所走的路線不同，不覺存在惡性競爭。日前陳法拉、鍾嘉欣和徐子珊三位上位花旦接受專訪，更攬頭攬頸打成一片，互相讓座，爭位爭凳仔？No way！徐子珊說：「工作咁辛苦，大家需要互相扶持多過需要敵人啦。」撰文：戴彩煥、卓寶花
        
        徐子珊
        平凡焉知非福
        
        28歲的徐子珊於04年當選港姐冠軍後晉身演藝圈，雖然在去年無綫台慶頒獎禮中獲「飛躍進步女藝員獎」後，又憑《跟蹤》一片獲提名今屆香港電影金像獎最佳新演員，但她自覺演技方面仍然「未得」，一切有待進步。徐子珊說：「睇番轉頭，覺得應該可以再做好啲。入行咁多年，最深刻係啱啱選完港姐之後做奧運直播嘉賓主持，當時又唔識望鏡頭，完全唔知自己做緊乜嘢，睇番轉頭都嚇死我。」
        
        搏殺期  不怠慢
        
        演技方面，徐子珊仍嫌未到家，但說到產量，徐子珊卻十分滿意，她說：「拍咗兩部電影同三部電視劇，事業發展都OK。好多導演同我講，話我靚又唔係最靚，身材又唔係最好，所有嘢都係中庸，亦都因為中庸，所以好適合去做演員，因為可塑性高，可以做一個好平實嘅女仔，亦可以做一個女強人或者男仔頭。」
        
        入行4年，徐子珊一直有個心結，就是沒有機會接受正統的戲劇訓練，徐子珊說：「一選完（港姐）之後就開始幕前工作，未有正式訓練，始終覺得差啲，唔係咁得心應手。其實未拍劇之前，我都有上過詹瑞文嘅course，上level 1同level 2，但始終唔能夠好專心咁上，因為冇幾耐已經要拍劇，有時收工之後好攰，支持唔住又吸收唔到，投入唔到去學嘢。」徐子珊相信無綫可以給予幾個月假期讓她參與一些短期課程進修，但自己明白到搏殺期，幾個月時間，分分鐘失去了很多機會。
        
        每年選美結束後，為無綫增添一批生力軍，尤其是近年無綫吸納了一班華姐，如鍾嘉欣和陳法拉等，可覺得競爭越來越大？徐子珊說：「我又冇諗過，自己做自己嘢，唔係每一個都入行，呢行有劇集、電影、舞台劇同唱歌，有好多發展空間畀人去做，需要唔同嘅人才，而且TVB一年開咁多套劇，都唔能夠一個人做得晒啦，咁咪一齊去做囉。」
        
        
        徐子珊最遺憾當選港姐後未有接受正統演藝課程訓練。
        
        讚曼玉  有個性
        
        徐子珊表示，她與鍾嘉欣和陳法拉之間根本不存在爭風呷醋問題，相反她們經常攬頭攬頸十分老友，徐子珊說：「工作咁辛苦，大家需要互相扶持多過需要敵人啦。」同是選美出身的張曼玉，是徐子珊的事業目標，雖然知道現階段遙不可及，但她表示會朝這個方向努力：「佢唔係標榜靚女，好有個性，生活態度我好欣賞，見佢喺康城影展坐喺評判席，一個香港小姐可以去到呢個level，真係好犀利。」
        
        
        徐子珊大有機會憑《跟蹤》成為今屆香港電影金像獎最佳新演員。劇照
        
        回想04年任奧運節目嘉賓主持的情況，徐子珊完全不知道自己在做甚麼。資料圖片
        
        鍾嘉欣
        力保清白之軀
        
        23歲的鍾嘉欣膺04年華裔小姐冠軍後晉身娛樂圈，加盟無綫獲得器重，是無綫力捧花旦之一，近年還得到電影商垂青，進軍影壇，在第二十七屆香港電影金像獎中憑《十分愛》獲提名最佳新演員，雖然未稱得上是大紅大紫，但機會總是接踵而來，獲不少監製器重，鍾嘉欣不置可否說：「可能我少負面新聞，個樣望落乖乖女，感覺容易接受。我都捱得o架，拍劇監製要我滾地、吊威我都冇所謂，可能勤力係搵我原因之一。」
        
        
        鍾嘉欣入行至今是非或緋聞不多，她希望可以繼續保持清純形象。
        
        絕緣體  零緋聞
        
        然而鍾嘉欣由入行至今負面新聞及緋聞也同樣絕緣，對比同期上位花旦的風頭較低調，鍾嘉欣直言會力保清純：「我唔想太多新聞，好多人都覺得呢行嘅女仔唔好，我想做到clean啲，o依家都仲keep到形象，唔想有機會俾人話我。」同行如敵國，面對上位競爭，鍾嘉欣只會視自己為對手，她說：「大家做朋友好過，每人路線都唔同，我同徐子珊、陳法拉都係選美出身，佢哋個性好爽，好有藝術天份，又識跳舞，真係上緊位嘅花旦。」
        
        鍾嘉欣最欣賞佘詩曼的努力不懈，她說：「好多人都話我條路同阿佘相似，佢一年拍5至6套劇，我捱咗3年幾不斷拍劇都覺得好耐，但回想當年大學畢業，參加選美只得19歲，覺得有機會做明星喎，就試吓，當時根本唔知係咪鍾意做呢行，後來好多人鼓勵我，o依家唔想衰，繼續去做。」
        
        
        鍾嘉欣（右）憑《十分愛》角逐今屆金像獎最佳新演員，跟好姊妹徐子珊拗手瓜。劇照
        
        演《溏心》  練演技
        
        鍾嘉欣入行最滿意之作是去年《溏心風暴》中飾演常在心一角，同時也令觀眾留下深刻印像，對鍾嘉欣而言是一個好磨練，她說：「《溏心》係長劇，可以多啲時間發揮，又多前輩配合，令我學到好多。常在心個結局大家都好鍾意，自己睇番都眼前一亮，以前我經驗未夠，唔識得連貫反應，拍完呢套劇之後進步咗。」論未能發揮水準之作，鍾嘉欣即想起與鄭伊健合作的劇集《隨時候命》，她說：「當時飾演初級飛行服務人員，由處境劇跳出去，情緒、時間各方面都唔適應，畀咗好大壓力自己，結果唔係幾滿意。」
        
        
        鍾嘉欣在《溏心風暴》中飾演的常在心，最受觀眾受落。劇照
        
        陳法拉
        心中藏一團火
        
        26歲的陳法拉於05年獲選華裔小姐亞軍後加盟無綫，雖然比徐子珊和鍾嘉欣遲入行，但見報率卻遠遠超過兩位師姐，一時被指是姣精，一時又指她被人排斥，是非新聞一籮籮，陳法拉不諱言曾因為負面新聞影響心情，她說：「初入行嘅時候睇到呢啲新聞都影響心情，我都唔係咁嘅人，點解寫到我咁！」
        
        陳法拉續說：「雖然呢行需要曝光率，但我唔覺得呢啲新聞幫到一個演員。後來覺得唔寫都寫咗，反正唔係真實，我唔會再放喺心上。雖然我係公眾人物，但我覺得冇必要畀觀眾認識陳法拉真正係乜嘢人，所以我平時唔會寫blog，鍾意自己有個私人空間，做戲之外做番個正常人。」
        
        
        陳法拉因為是非提升知名度，她覺得對一個演員來說絕對不是好事。
        
        自信強  冇對手
        
        未知是否感同身受，談到事業目標時，陳法拉巧合地選了章子怡：「佢做嘅戲我好欣賞，雖然佢入行以嚟好多是非，但佢冇理會，由內地成功打入荷李活，我覺得佢變化都幾多，好似嗰部《茉莉花開》，由10幾歲做到幾十歲，真係演得好。」雖然同行如敵國，但陳法拉不覺得一班差不多時間出道的女孩子間爭風呷醋，也不感到競爭壓力，她自信地說：「我暫時冇搵到一個marketing position相似嘅女仔。」
        
        
        章子怡在《茉莉花開》的演出令陳法拉讚嘆不已。劇照
        
        資歷淺  成績佳
        
        去年無綫台慶頒獎禮上，陳法拉憑《舞動全城》獲得最佳女配角，雖然入行短短兩年多已有成績，但她表示還未有較滿意之作，僅是《舞》劇中，她與劇中母親陳曼娜和兄長馬浚偉鬧意見後離家出走一幕，最令陳法拉回味，更重要的是令她知道自己心中有一團火，她說：「拍之前自己準備咗好耐，場戲一take過，拍完呢場戲之後，覺得自己原來都有potential做到，見到同場演員都喊出嚟，自己設計出嚟嗰樣嘢真係做得到，喺自己身體入面有呢樣嘢，於是開始畀到自己信心。」
        
        陳法拉續說：「我覺得冇底子係吃虧啲，所以我同公司講過，想去美國讀啲演藝課程，一去起碼一年，但不停有劇拍，暫時都冇乜可能，或者睇吓香港演藝學院有冇一啲合適嘅短期課程；有時我都捉住王祖藍，問佢以前返學學啲乜嘢o架。」
        
        
        陳法拉因為劇集《舞動全城》中與陳曼娜（右）一場鬧交戲，令她發覺到自己心中原來對演戲有一團火。劇照
        
        
        徐子珊、鍾嘉欣和陳法拉雖然是無綫今年力捧上位花旦，但三人friend過打band，未有因競爭而勾心鬥角。
        
        攝影：陳慧安
        協力：藍文浩
        服裝：I.T.
        髮型：陳法拉（Hair Salon ide by Ling）、徐子珊（Debby Kwan of Hair-CWB）、鍾嘉欣（ben lam of ilcolpo）
        化妝：鍾嘉欣（Marsha Ma）、徐子珊(Omix_B)

falafan

难怪法拉很少写blog。。。

Sheila

Does Fala mean to say TVB's blog were not updated by herself?

but recently her blog were mostly updated in English, I think she started to write on her own...