深情對話：陳法拉：個獎純金就唔同
東方日報2010-11-28
無料辦事的人總愛假大空，但陳法拉卻大不同，預知太早攞視后定必中伏，做人還是實際一點比較穩妥。因為《義海》有鄧萃雯方尊在上、《公主》則有佘詩曼坐定粒六，時機未成熟又何必大隻講？況且法拉說：「攞視后唔係我最終目標……個獎純金就唔同！」
法拉只希望脫甩花瓶之名，做個真正演員。
陳法拉：陳 記者：記
無綫花旦買少見少，05年入行的法拉要肩負的責任就愈來愈重，有人認為她做視后指日可待，但法拉是一個實際的人，有時太早升呢，只是一席甜品盛宴引誘你上斷頭台，打入萬劫不復之地。
記：覺得今年係最接近視后嘅一年？
陳：一啲都唔近，起碼我唔會咁睇，《義海豪情》我唔係女主角，雯女先係擔正，《公主嫁到》都係，只有《蒲松齡》先係女主角！
法拉謙稱演技距離收放自如仍差千億里。
鍾意頒獎禮氣氛
記：唔想升呢攞獎？
陳：攞唔攞獎真係冇乜所謂，入到套好劇已經得咗，30幾集大劇，觀眾睇足我30幾日已經係大獎賞，攞視后無疑係吸引到關注，但唔係我最終目標。
記：視后始終係無綫最高榮譽喎？
陳：（打趣說）如果個獎係純金就唔同喇，你知依家金價貴到離譜，熔咗佢真係攞番唔少錢！哈哈！反而我更加鍾意頒獎禮個氣氛，可以一次過見晒啲朋友，好似開Party一樣咁熱鬧。
記：是否覺得自己未夠火候？
陳：進步係永無止境，我鍾意不斷學習嘅過程，結果唔太重要，我仲有排學。距離收放自如，我仲爭千億里，依家我只希望脫離花瓶，得到一個演員身份，咁我先可以繼續喺呢行立足。
鄧萃雯一句「香港電視靠晒你哋」，法拉如注強心針。
坦承少少驚雯女
記：今屆視后睇好邊個？
陳：阿佘同雯女我都好鍾意，真係好難揀。其實我同阿佘合作好多次，同佢同場，了解到佢嘅工作態度，明白到做一個演員嘅修養。但我又覺得雯女冧莊好喎，我同佢對手戲唔多，但知道佢角色好沉重，對白又多，喺廠都唔敢騷擾佢。講真，當時真係有少少驚佢！
記：有冇從雯女身上偷師？
陳：原來我嘅感覺係錯，到煞科慶功，雯女再不見沉重一面，反而行過嚟同我、定欣講「香港演員唔夠，香港電視靠晒你哋，大家飲多啲」，我知道佢認同我先會咁講，係入行以來最大嘅鼓勵！
「起碼要生兩三個」
中國二千年來都以儒家思想治國，「不孝有三，無後為大」更深深烙印在國人腦海中。法拉雖然在外國長大，但生兒育女是女性天職，若然有天腹大便便，法拉會選擇事業還是愛情？
記：想結婚生仔嗎？
陳：結婚生仔一定係我必經階段，真係好期待，希望人生可以好幸福，我係一個好簡單嘅人，呢個世界唔會有嘢比家人更親。
記：生小朋友後如何兼顧家庭同事業？
陳：我諗第日起碼會生兩三個，我知道湊小朋友一定要用心同時間，我應該兼顧唔到事業，就算養貓都要take care啦，何況自己骨肉？
五餸一湯好「依時」
記：依家又會點揀？
陳：我又冇小朋友，當然可以兼顧家庭同事業。暫時都冇人逼我，絕對冇衝突，當然生咗小朋友就難啲。
記：聽聞你好鍾意下廚？
陳：係呀，細個媽咪煮嘢食，我一定會幫手，我又鍾意睇食譜，所以家常小菜難我唔到。以前日本留學，我又跟當地家庭學整日本料理，加上成日食西餐偷師，中西日五餸一湯絕對「依時」。
記：會唔會特別多人讚？
陳：我整嘅牛腩真係好多人讚，好多朋友食過都話正，佢哋仲叫我可以開間台灣牛肉麵，一定有生意。
記：會唔會出書講飲食？
陳：我諗唔會喇，煮嘢食只係我興趣，我又唔係有乜大心得，唔想空口講白話呃錢。
後記：手勢媲美大廚級
法拉從不喜歡炫耀自己，尤其是了得的廚藝，掩飾得以為她是一個飯來張口的人。原來實情倒是相反，隨她身邊多年的經理人表示，也嘗過法拉的手勢，大讚媲美大廚級，絕對可以出書。然而，法拉斬釘截鐵不會出烹飪書，這是否另類的「假大空」？
文：霆 攝：吳文聰
服裝及場地：Miss Sixty
《義海》結局晴晴不敵病魔
東方日報2010-11-28
陳法拉今年成績突飛猛進，年頭到年尾共有四部劇集播出街，在台慶頒獎禮中連叫「三飛」，被提名「最佳女主角」、「最佳女配角」及「我最喜愛的電視女角色」，令攞獎機會提升。
熱播中的《義海豪情》今晚將播映大結局，飾演苦命晴晴的法拉，雖能與楊陽結成夫婦，但最終仍不敵病魔，離開醫院返到豬籠里後，在丈夫的懷抱中安然離世。至於觀眾最關心的劉醒和九姑娘，在戰亂中分隔數十載，劉醒一度失去記憶，兩人在晚年重逢，坐在長櫈上看夕陽，歷劫滄桑的劉醒頭慢慢一側，倚在九姑娘的膊上安樂死去。
10年功力登視后
東方日報2010-11-28
奪視后並非一朝一夕的事，觀乎無綫多年來出過的視后，無不花上近十年時間才能奪得此榮銜
佘詩曼 十年
阿佘貴為97年港姐季軍，甫出道被指演技平平，終花九年努力，06年憑《鳳凰四重奏》奪得視后，吐氣揚眉。
蔡少芬 十年
89年奪得香港小姐季軍的蔡少芬，經十年努力，98年憑《天地豪情》初嘗視后滋味。
宣萱 九年
宣萱自91年加入無綫後，前途如火箭直上，都要到99年憑《刑事偵緝檔案IV》才能成為視后。
張可頤 十年
雖然張可頤未能入圍94年港姐三甲，但經過九年努力，03年終憑《九五至尊》呂四娘一角登上事業高峰。
祥仔：唔為錢為乜？
太陽報2010-11-28
無論親生或非親生，黎耀祥及陳法拉均屬三色台的標誌人物，電視台每年製作數十套劇集，大多由幾個「特權分子」孭飛，劣幣驅逐良幣已是不爭事實，再嘆悲哀亦是多餘！不願作一生劣幣怎麼辦？是否由祥仔或法拉大喊一聲「我要做視帝、視后」便可解決？反正電視創作已買少見少，倒不如多賺幾桶金，乾脆做個星之煉金術師！
翻查黎耀祥十年前一個訪問，當他被問到要一個成名機會，還是要一百萬Cash？祥仔二話不說答道：「一定係一百萬！」物轉星移，十年後的今天，一百萬元對他來說已非大數目，若以一千萬元換取「荷里活一級演員」或「國寶級演員」名銜？其答案依然實際：「我會揀一千萬，因為我依家擁有嘅成就已經好滿足，喺行內行外都獲得認同，拍完《義海》真係滿足，要我喺演藝生涯畫上句號都冇怨言，做荷里活巨星我真係一啲都唔恨！一千萬就唔同，呢個數目唔多唔少，一千萬Cash夠我用埋下半世！」
面對現實搵銀無罪
祥仔對演戲的執着並非源自理想，而是生活態度的一種體驗，就如食飯一樣，日日都要食！不過，金錢卻是最現實的，他決不能戴着人皮面具空談藝術，他說：「無疑錢可以平衡到我嘅心態，呢個係現實問題，賺錢係永恒嘅道理，人唔係為錢為乜？」
非人實驗挑戰演技
猶幸有實力的人能在本分中尋找樂趣，不至在流水式作業的工作中慢慢溺斃，若說祥仔不懂演戲，「黎耀祥」三字着實能倒轉寫，遙視娛樂圈僅存的幾塊良幣中，他嘗試在演技中進行各種實驗：「演戲係要付出，就算好攰都想精神得到滿足，我會嘗試黐線嘅實驗！好似拍《鐵血保鏢》嗰陣，我試過發燒發到成個人傻咗，當時我仲諗緊好唔好返廠開工，添哥（李添勝）好人道，佢話過隨便我返唔返，當時我諗如果自己係一部機器就冇問題，試吓用意志忘記發燒，我玩咗兩日，真係Work喎！睇番Playback同平時一模一樣，原來肉體同精神真係可以分開o架，做演員真係好似入咗大觀園咁！」
無綫「唯一」傲視同儕
談及各種非人實驗時，祥仔眉飛色舞，「指」影橫飛，埋藏已久的傲氣散發全身，肯定自己是無綫的「唯一」，他說：「我諗TVB冇人可以好似我咁做，冇人會浪費休息嘅時間去做實驗同觀察，有時我仲會諗戲中嘅我同現實係咪可以接軌，可唔可以將佢融合，諗起都興奮！」
後記：人生如戲
當太座Julia如「指定動作」般為他整理衣裳時，祥仔卻一副撲克臉堆在五官，嚇得太太問他是否感到不適？祥仔即笑說：「哈哈！我只係扮嘢咋！」太自然了！親如Julia亦察覺不到！祥仔續說：「我拍戲再唔會將表情堆砌，反而想更自然，我兩年前開始做到，但劉青雲早我十年，呢啲就係天分！」
法拉：攞獎冇所謂！
太陽報2010-11-28
打從踏入電視城工作第一天，法拉注定加入電視城的「造星工程」，更屬十年內必登視后的幸運兒！雖然法拉的美貌獲公認，奈何演技需經浸淫，到底要一暴十寒硬推上位，抑或拾級而上賺取經驗？政治因素說明前者更為奏效。在《義海豪情》中，法拉的「花瓶味」不如過往般刺鼻，一年孭飛三、四套劇，加上深得主子歡心，連佘詩曼及鄧萃雯也未必穩奪大獎！
脫離花瓶站穩陣腳
不過，法拉是一個實際的女生，雖然離終極目標這麼近，她倒覺得獎項離她那麼遠：「一啲都唔近，起碼我唔會咁睇！《義海》我唔係女主角，雯女先係擔正，《公主嫁到》都係，只有《蒲松齡》我先係女主角！」她續說：「攞唔攞獎真係冇乜所謂！入到套好劇已經得咗，30幾集大劇，觀眾睇足我30幾日已經係大獎，攞視后無疑係吸引到關注，但唔係我嘅最終目標！如果個獎係純金就唔同喇，你知依家金價貴到離譜，熔咗佢真係攞番唔少錢！哈哈！」
其實法拉此言甚是，當藝人本為追名逐利，有云「Cash is King」，她深明視后不可當飯食，惟有脫離「花瓶」，做個有口皆碑的實力派才可套套大劇有份，「錢先會繼續嚟」：「有人話我未夠火候，呢樣嘢我知道永無止境，距離收放自如，我仲爭千億里，依家我只希望脫離花瓶形象，得到一個演員身份，咁我先可以繼續立足！」
感激雯女祥仔鼓勵
雖然《義》劇的大佬祥仔及甚少對手戲的雯女齊讚法拉演技初成，幸而她及早明白「獎唔可以咁快攞」的道理：「我同雯女同場唔多，佢劇本又多，角色咁沉重，真係唔敢同佢傾偈！開頭真係有少少驚佢，但原來我嘅感覺係錯！喺煞科宴，再見唔到佢沉重嘅一面，佢仲行過嚟同我、胡定欣講『香港演員唔夠，香港電視靠晒你哋，大家飲多啲！』我知道佢認同我先咁講，係入行以嚟最大嘅鼓勵！」
甘為湊仔放棄事業
不過，演員賺的是「有限錢」，嫁個有錢人才是王道，眼見城中超級富豪搵代母生BB，法拉坦言十月懷胎比較好，喜歡小朋友的她坦言，不介意為湊仔放棄事業：「結婚同生仔係必經嘅，我諗第日起碼會生兩三個，我知道湊小朋友一定要用心同時間，到時應該兼顧唔到事業，就算養貓都要Take Care啦，更何況係自己骨肉？」
後記：傲骨柔情
眾所周知法拉名花有主，大可疊埋心水做少奶奶的她，其實毋須追求視后榮耀，但她天生一副硬骨頭，別人視她為劣幣，她卻執意要做良幣，更揚言未到生仔一刻決不息影：「我會繼續做落去，唔瞓都要做，要令人改觀！」法拉呀！良幣也會磨損，錫錫身子好喎！
外表柔弱的法拉永不言敗，揚言未到生仔一刻決不息影。
法拉憑《舞動全城》勇奪「最佳女配角」，花瓶終有出頭天！資料圖片
演技再下一城的法拉，今年憑《蒲松齡》的狐妖入圍視后。
法拉難忘雯女與祥仔的鼓勵，希望在公仔箱站穩陣腳。資料圖片
大結局死得人多 九姑娘伴劉醒最後一程
太陽報2010-11-28
台慶劇《巾幗梟雄之義海豪情》安排在8時半的不利時段播放，雖然結局周預計收視難以打破歷年之冠《大長今》的紀錄，但外界口碑不俗，除黎耀祥及鄧萃雯承接上輯餘威外，不少新角色如「晴晴」陳法拉、「楊陽」黃浩然及「非凡哥」麥長青等都成功搶戲，法拉更在今年台慶頒獎禮上連叫三飛，提名「最佳女主角」、「最佳女配角」及「我最喜愛的電視女角色」，認真威水！《義》劇今晚播映大結局，幾位關鍵人物的生死令人關注。
劉醒戰後重遇九姑娘
劉醒（黎耀祥飾）與九姑娘（鄧萃雯飾）在戰亂中失散，劉醒一度失去記憶，數十年後二人重逢，坐在長櫈上看夕陽，歷盡滄桑的劉醒頭慢慢一側，倚在九姑娘肩膊上安然逝世。
晴晴在楊陽懷中病逝
苦命的晴晴（陳法拉飾）雖一償所願與楊陽（黃浩然飾）結為夫婦，但最終不敵病魔，離開醫院返回豬籠里後，便在丈夫的懷抱中安然病逝。
少康中槍亡嚇瘋母親
少康（黃智賢飾）在鄭家發難，拔槍指嚇眾人要求分身家，混亂中被槍殺，母親朗喜（謝雪心飾）瘋瘋癲癲拖着其遺體離開。
晴晴在楊陽懷中病逝
視帝視后爭崩頭
太陽報2010-11-28
黎耀祥：2010年代表作
《義海豪情》
今年不做「柴九」做「劉醒」，演技更上一層樓，但獎項受太多政治因素影響，祥仔冧莊之路可謂荊棘滿途。
陳 豪：2010年代表作
《公主嫁到》
陳豪在節目巡禮上吸引大批客戶爭相合照，可見《公主》威力令他大有機再次覬覦視帝寶座。
林 峯：2010年代表作
《談情說案》
去年遲來先上岸，先奪「亞太最受歡迎男歌星」獎，林峯力爭視帝亦有機。
鄧萃雯：2010年代表作《義海豪情》
《義海》儼如Solo，祥仔的戲幾乎被雯女搶光，全民嗌破喉嚨希望雯女冧莊，未知無綫會否從善如流？
佘詩曼：2010年代表作《公主嫁到》
擺明是無綫頭號花旦，《公主》又收得，加上天時地利人和，阿佘攞多幾年視后都仲得。
陳法拉：2010年代表作
《蒲松齡》、《公主嫁到》、《義海豪情》
三套大作一部接一部出籠，氣勢一時無兩，不過法拉資歷尚淺，可能影響票源。
support fala外表柔弱的法拉永不言敗，揚言未到生仔一刻決不息影。
| 欢迎光临 法拉城-陈法拉网站 (http://falachen.org/bbs/) | Powered by Discuz! X2 |