陳法拉第一次做搞笑角色，對白又長又難記，要額外花很多時間背誦。 攝影：仇志中
公主驕語第七話
能文能武整古作怪 法拉爆發喜劇潛能
蘋果日報2010-09-22
陳法拉近日演出無綫劇集《公主嫁到》中司徒銀屏一角，表現令觀眾有讚無彈。她直言劇中性格與現實相若，故演出時較易掌握，反而對白和武打場面是一種考驗，幸好最終從享受中克服困難，連帶發掘了自己深藏已久的喜劇細胞。 撰文：王崇穎
無綫劇集《公主嫁到》播出以來收視和口碑均叫好叫座，連帶劇中演員也人氣急升。首次向喜劇發展的陳法拉在劇中扮演武功高強、負責保護公主佘詩曼的近 衞司徒銀屏，她透露角色個性男仔頭，與本身性格很相似，連朋友都笑指她只是做回自己。
法拉直認銀屏有情有義與自己最相似，她日前接受訪問說：「我本身都好重情義，朋友都覺得我係做番自己，所以唔算太難，反而係對白比較難，好多四字又四字嘅古文，我都只可以靠死記。另外仲要練武打場面，自己又第一次做打女，好吃力，不過都係一種經驗。」
陳法拉第一次做搞笑角色，對白又長又難記，要額外花很多時間背誦。 攝影：仇志中
打戲弄歪脊椎
由首集出場開始，法拉的對白已相當抵死，但相對很難記，單單她的銜頭「錦鳳朝凰左右護法太妃御賜金牌近身司徒銀屏」已不簡單，問可有經常 NG，她說：「雖然都有 NG，但反而係打方面比較多，佢哋會拍比較多鏡頭去揀，所以會拍多幾次，都唔算 NG嘅。」
對白又長又難記，法拉下了不少苦功：「有場戲講我同公主啱啱到金家，由我介紹公主出場，我要一口氣講晒成頁紙嘅對白，初初收到劇本已經好驚，所以好花心機去背，好彩最後冇 NG。」
一直以來，法拉都希望嘗試不同角色以磨練演技，今次搞笑演出對她來說已是躍進一大步，她說：「其實都唔知自己搞笑可以去到咁癲，加上陳豪教咗我好多古靈精怪嘅嘢，自己做到都好開心。我想向唔同方向發展，唔想每次只係靚靚咁行出嚟。」不過，嘗試不同角色也要付出代價，她說：「睇人做打戲同自己落手落腳打真係兩回事，避唔過損手爛腳，拍完成日腰痠背痛，之後都有去睇專科，醫生話我脊椎歪咗，家食止痛藥都成大半年。」
「錦鳳朝凰左右護法太妃御賜金牌近身司徒銀屏」鏡頭前武功了得，鏡頭後卻傷痕纍纍。 劇照
慶幸遇好男人
劇中法拉與佘詩曼拍檔最多，她讚阿佘說：「我喺佢身上學到好多嘢，咁多人之中佢嘅頭飾最重，但佢一埋位就好投入，而且 EQ好高，特別面對負面新聞，佢真係處理得好好，佢成日同我講做好本份最重要。」
《公主嫁到》中的司徒銀屏渴求愛情，法拉卻坦言現實中感情隨緣，她說：「由細到大都唔會好恨拍拖，有啱嘅人出現就會接受。我覺得自己向來都係被愛多少少，好好彩未遇過壞嘅男人，個個都好專一。」
陳法拉坦言不會刻意追求愛情，猶慶幸從未遇過壞男人。
笑聲之最：最好笑同劇女演員 佘詩曼
「我覺得係阿佘囉，睇番佢真係做得好好，野蠻得嚟又唔會乞人憎，而且畀到人感覺呢個公主好可愛，好多場戲都做得好好笑，而且仲係好有層次嘅搞笑，誇張得嚟絕對唔會乞人憎。」
法拉（左）大讚佘詩曼投入和專業，扮起野蠻公主也相當可愛。
最好笑同劇男演員 阮兆祥
「梗係阮兆祥喇，佢本身成個人行出嚟已經好好笑，成身都係喜劇細胞。呢個角色又比較大情大性，人又蠢蠢哋咁，每次佢嘅反應都令到我哋覺得好好笑。」
最好笑自己演出的一幕 毆金家兄弟
「頭嗰幾集講我同阿佘扮男裝出宮外玩，點知喺酒樓撞到金家三兄弟，公主叫我打佢哋，之後打起上嚟，佢哋俾我打嘅反應同表情都好好笑，拍咗兩日，拍出嚟嘅效果依然好好笑。」
電視圖片
《公主嫁到》 Hit爆台慶勢強
阿佘、陳豪視后視帝大熱
蘋果日報2010-09-22
無綫人氣劇集《公主嫁到》越戰越勇，佘詩曼夥生鬼陳豪破格搞笑，上演昭陽玩謝金多祿，附加宮廷妃嬪波詭雲譎工心計，輕易擄獲約 210萬觀眾掀全城煲劇潮，公主駙馬也驟成年底無綫台慶頒獎禮的帝后大熱。不過梟雄雙驕機關算盡下月勇者回歸，鄧萃雯和黎耀祥挾去年餘威，隨時憑《巾幗》系列《義海豪情》反超前，雙生雙旦誰能榮膺視帝視后，仍有一番龍爭虎鬥。
無綫劇集《公主嫁到》自開播至今，平均收視一直保持 33點（約有 210萬觀眾），佘詩曼飾演的昭陽公主嬌生慣養刁蠻成性，與正義滿腔的金多祿陳豪發放連場笑彈，加上陳法拉扮好打護法配出色綠葉李香琴及阮兆祥等襯托，又有宮廷妃嬪爾虞我詐的橋段，有齊煲劇元素，難怪令劇集人氣爆燈，更造就阿佘及陳豪不費吹灰之力成為台慶頒獎禮的大熱帝后人選。
宿敵新劇下月播出
今年的《萬千星輝頒獎典禮》將於 12月舉行，雖然距頒獎禮尚餘兩月，但因無綫今年播出劇集未有太突出之作，最具話題性及最旺場的除《公》劇外，只餘被指涉抄日劇《神探伽利略》的《談情說案》，但《談》劇的林峯和楊怡，論火花似不及阿佘和陳豪的生鬼破格，入屋程度稍遜一籌。
不過《公》劇並非坐定粒六，終極強敵下月將強勢殺到，由去年帝后黎耀祥和鄧萃雯合演的台慶劇《巾幗梟雄之義海豪情》，鐵定下月 18日播出。今次祥仔扮演一個 30年代的刑偵隊隊長，雯女則演大毒梟九姑娘，兩人份量十足又被公認好演技，必定對阿佘及陳豪造成威脅。
阿佘 06年曾憑《鳳凰四重奏》獨攬 TVB最佳女主角及我最喜愛的電視女角色獎，成為無綫首位雙料視后，但去年她在《宮心計》中演劉三好贏盡口碑，仍慘遭四奶奶雯女射下馬。今年兩位視后再次 PK，對於率先被封視后大熱，阿佘前日在電話中回應說：「家講似乎早得滯，好多劇仲未出街，候選名單又未出。總之好多謝觀眾支持，有大家支持我已經覺得好開心，其他嘢唔會諗。」
秋官讚陳豪多元化
至於陳豪單挑黎耀祥，誰被 KO仍屬未知之數，但他先要與鄭少秋（秋官）較量演技，合演新劇《心戰》。陳豪在新劇飾演魔術師兼連環殺手，昨日他與秋官、陳茵媺及邵美琪等到將軍澳電視廣播城試造型。首度合作的秋官和陳豪一見面即互笠高帽，陳豪讚秋官劇內劇外俱是戲劇大師。提到秋官拍劇多年從未封帝，陳豪說：「咁點同呢，佢係無形視帝，當年係憑實力封帝，家嘅視帝有好多唔同嘅因素。」
秋官也大讚陳豪拍劇後嘗試不同造型很多元化，他說：「我好鍾意睇佢做戲，佢好乖。」對於陳豪指他是無形視帝，秋官笑說：「係啦，畀佢攞晒。」又自嘲生不逢時，現在已無意爭視帝，他說：「攞獎唔簡單 o架，要好多嘢配合。」
採訪、攝影：葉雪、王崇穎
人氣指數：《公主嫁到》收視高企
由陳豪、佘詩曼、鍾嘉欣、陳法拉、馬國明和黃浩然等主演的無綫喜劇《公主嫁到》，上月首播，首周便有平均 33點收視（即約有 210萬觀眾），且氣勢持續強勁，一直保持高收視，最高收視更曾錄得 37點（即約有 256萬觀眾）。該劇在無綫 MyTV網的點擊率也一直高踞榜首，至昨日為止點擊次數達 52萬次，遠遠拋離第二位、有 13萬點擊次數的《天天天晴》。
除陳豪和阿佘兩位主角受歡迎外，其他演員的抵死演繹也在網上引起熱烈討論，其中飾演金太夫人的李香琴及公主近身的陳法拉更是人氣爆燈。
話你知：台慶頒獎禮陪跑者眾
陳豪和佘詩曼憑《公主嫁到》的破格搞笑演出成為視帝視后大熱，而且縱觀今年無綫播出的劇集，能威脅兩人的花旦小生確實不多。
－視帝挑戰者－
•陳豪（ 39歲）
爭獎角色：《公主嫁到》三駙馬
•林峯（ 30歲）
爭獎角色：《談情說案》 Kingsley
•歐陽震華（ 50歲）
爭獎角色：《施公奇案 II》施世綸
•林保怡（ 45歲）
爭獎角色：《掌上明珠》何祥興
•馬浚偉（ 38歲）
爭獎角色：《蒲松齡》蒲松齡
馬浚偉（圖右）
－視后挑戰者－
•佘詩曼（ 35歲）
爭獎角色：《公主嫁到》三公主
•楊怡（ 31歲）
爭獎角色：《談情說案》犀利妹
•陳法拉（ 28歲）
爭獎角色：《蒲松齡》令狐小翠
•毛舜筠（ 51歲）
爭獎角色：《天天天晴》井喬
•汪明荃（ 63歲）
爭獎角色：《女王辦公室》雷小鳳
資料來源：《蘋果》資料室
今年难道也是先台庆在颁奖？？
視后挑戰者 陳法拉（ 28歲）
| 欢迎光临 法拉城-陈法拉网站 (http://falachen.org/bbs/) | Powered by Discuz! X2 |