法拉城-陈法拉网站

标题: [FACE周刊第62期]《家好》小花啞妹法拉惡女楊怡鬥彈 [打印本页]

作者: tomato-129 时间: 2008-7-29 18:30:26 标题: [FACE周刊第62期]《家好》小花啞妹法拉惡女楊怡鬥彈

TV Fans：《家好》小花啞妹法拉惡女楊怡鬥彈

      惡女楊怡加啞妹法拉，你見過未？

      呢個星期開播嘅《溏心風暴之家好月圓》一次過見晒佢新形象。上次《溏心》靠喊苦喊忽彈起嘅鍾嘉欣，今集《家好》繼續賣喊功；相反3點式索女陳法拉同新抱仔楊怡，今鋪有望彈起嘞。一個冇聲出指手劃腳做啞女、一個大聲夾惡做火爆妹，唔驚你班老戲骨。仲有後加新成員徐子珊做關菊英個反骨女都好搶吓，但小花珊要到22集先出現，比起法拉同楊怡頭五集已經發力攞分，蝕啲囉。

      陳法拉同楊怡兩個小花嘅必睇喊戲同鬧交戲第一個禮拜已經會播，記住睇呀！

      自卑乖咪

      索女陳法拉上集《溏心》着3點式玩渡海泳嗰場，個個睇完都話正，今時今日上晒位嘅佢，唔使再靠三點式引人注意，反而嚟個180°大轉變，飾演啞妹甘詠慶。
      細個因為做扁桃腺手術整壞聲帶搞到啞咗嘅佢，要靠手語同人溝通，搞到性格鬼咁自卑，成日匿埋喺餅鋪唔敢見人，後尾得屋企人支持終於衝出餅鋪去做嘢，仲鍾意埋上司楊天經，但又被天經屋企人藐佢，差啲婚都結唔成。個角色咁柔弱內向，成日俾人話臭寸嘅法拉，應該可以攞番唔少同情分。

      人人都可以哈哈聲咁笑，但係我笑係冇聲嘅！

      必睇喊戲

      今次大突破演啞女，場場戲都要記熟晒啲手語，陳法拉就落咗唔少工夫。平時將啲手語手勢入落iPod，方便佢隨時拎出嚟練，夠勤力喎。

      第4集入面啞女阿慶見工都要帶埋阿哥（林峰飾演）幫佢翻譯，呢幕講阿慶「講」出自己嘅心聲，話自己笑同喊都冇聲，鬼死咁慘，好感動o架！

      啞女阿慶同楊天經一對，但係網友就話楊天經騎呢，唔想睇佢。人地話晒都係寶珠姐個乖仔，畀吓面啦。

網友意見

又惡又喊

嗰邊有啞女法拉、呢邊楊怡都唔弱。佢飾演孫皓月係荷媽李司棋執返養女，成日被菊姐排斥，話佢係「攞女」（攞返嚟養嘅女，都係《家好》新term），所以成日同菊姐鬧大交，擦出唔少火花！但其實佢只係外表堅強、內柔弱，被菊姐話得多，覺得自己唔係甘家人，仲離家出走，好彩後尾被荷媽感動留番甘家。
身世坎坷，感情方面亦唔見得好，佢鍾意咗掛名大佬陳豪但又唔敢表白，仲要被情敵徐子珊跣，除咗鬧人，仲有唔少喊戲畀楊怡發揮，呢啲位咪又攞晒分囉。

你夠唔夠膽唔認呀？你向燈火發誓吖！

必睇鬧戲

火爆女楊怡同菊姐鬼咁多鬧交戲，呢場仲鬧到扯晒頭髮咁激，睇唔出平時斯斯文文楊怡都幾狼喎。
有咁又點吖？我唔講，我冇錯！

楊怡個角色一時要惡死鬧人、一時又要委屈喊晒，真係少演技都唔得，好在楊怡演技有番咁上下啫。

「攞女」楊怡成日都想有自己嘅屋企，但佢鍾意嘅陳豪又情陷徐子珊，又係一段痛苦嘅三角戀，唉！

大馬搶閘

《家好》熱潮湧到嚟，套劇未正式出街大馬Astro華麗台就整個先睹為快精華片段，網友仲將條片擺上YouTube分享。雖然只係得頭四集零碎精華片，但四位老戲骨瞓晒身演出，當中最搶嘅係菊姐同琴姐，網友睇完都話精采，仲話好期待之後更激嘅場面添！

網友意見

細契關菊英奸角雖然讓咗畀米雪做，但今次飾演嘅鍾笑莎仍然係咁乞人憎，成日搞風搞雨，得罪人多稱呼人少。

你個死女包，唔一巴二巴車到你口水鼻涕一齊流，我同你挽鞋！

新加入嘅李香琴飾演司棋姐嘅奶奶，以為司棋姐害死自己個細仔所以勁憎佢。琴姐鬧人時依然中氣十足，七情上面，果然係寶刀未老呀！

我就算爆血管，都要數臭呢個女人！

作者: hoyuen41 时间: 2008-7-30 11:31:03

网友为什么说FALA不用只做奸角？
她经常做奸角吗？哪出？

作者: falafan 时间: 2008-7-30 11:33:58

原帖由 hoyuen41 于 2008-7-30 11:31 发表
网友为什么说FALA不用只做奸角？
她经常做奸角吗？哪出？

《师奶兵团》《舞动全城》《金石良缘》

欢迎光临法拉城-陈法拉网站 (http://falachen.org/bbs/)