2007.10.08《志云上素》法拉访问 - 法拉城-陈法拉网站

        日前陳法拉擔任陳志雲主持的《志雲上素》嘉賓，有關訪問將於今晚《開心聊齋》中播出。節目中，陳志雲除親自下廚整齋菜外，更就近日城中一些傳聞追問陳法拉。（以下為部份訪問內容）
        陳志雲：雲陳法拉：拉

        雲：有報道話陳法拉係姣精，睇到報道反應係點？
        拉：我唔知姣精廣東話有幾衰，有啲人聽到會好唔開心，嗰時我問咗我經理人乜叫姣精，佢話公司好多個都係姣精，好多女artist都俾人話姣精。
        雲：例如邊個？
        拉：例如Suki徐淑敏、阿佘（佘詩曼）都係用個姣字嚟形容，佢（指經理人）咁同我講：「所以你唔使咁唔開心。」佢解釋畀我知姣係乜嘢，佢用英文解釋話即係女仔好flirty（姣）。
        雲：即係勾搭人哋？
        拉：係呀，好親近啲男人，好鍾意show off（賣弄）自己嘅身材。
        雲：你係咪好鍾意show off自己身材？
        拉：我諗我骨架比較瘦啲，啲衫着上去覺得好啱，唔使點改，我都好鍾意買啲好鍾意嘅衫。
        雲：你唔介意着得暴露啲？
        拉：公司衫嚟o架喎，冇得揀。
        雲：你同廖碧兒有冇心病？係咪朋友？
        拉：唔係朋友，唔係好friend嘅同事，因為佢又好忙。開完劇都有嘢傾嘅，但因為寫咗啲嘢（指不和報道），大家心入面唔好意思，搞到成件事好尷尬，跟住一齊去咗北京做嘢，喺巴士入面傾偈、一齊影相，但係未去到一齊約出去食飯。

燒汁盤龍燒茄子今次主題是紫色的食物，用紫色的茄子作為主菜。而今次的嘉賓是著紫色衫的陳法拉，陳志雲會問她被稱為姣精的看法，法拉又會講以前選美的趣事及家事，想了解法拉就要留意節目播出。

材料：茄子、銀杏、靈芝菇、盧荀製法：先將茄子中間切開，然後再切開一件件走油備用，將銀杏、靈芝菇、盧荀切好及走油後，加入茄子再蒸5分鐘就可食用。